సాఫల్యము

భక్త కోటి 'నిరీక్షణమున,
ప్రతీక్షణమున ప్రతి క్షణము
పగడాలు తాపిన హారములు ఆయెను //

నీ నామ మననమున
ఈ పెదవులు
ఈ పలుకు నిగ నిగలు ,
మిసిమి తళుకుల్ల
కోవెలకు తోరణములయ్యేనుగా! //

నీలములు నింపిన భరిణలే ఆయెను
నిన్ను వీక్షించినవి- గాన
ఈ నయనములు
ఈ దృక్కు ధగ ధగలు వలయమ్ములు'
విష్ణు వడ్డాణములె ఆయేనుగా! //

మరకత, మణి స్థగితమౌ మందిరమ్ము
శ్రీ వేంకటేశుడు కొలువైన మానసము
అందు, ధ్వని ఆతడే! ప్రతి ధ్వని ఆతడే!
నిశ్శబ్ద ఓంకార సడి ఆతడే! //